साउदीको रक्षा मन्त्रालयमै हुथीको मिसाइल आक्रमण !

काठमाडौं । पश्चिम एसियामा जारी तनावका बीच यमनका हुथी विद्रोहीले साउदी अरबका महत्त्वपूर्ण सुरक्षा तथा ऊर्जा केन्द्रलाई लक्षित गरी आक्रमण गरेको दाबी गरेका छन् । हुथी विद्रोहीका अनुसार राजधानी रियादस्थित साउदी रक्षा मन्त्रालय र देशको प्रमुख तेल प्रशोधन केन्द्रमध्ये एक रास तनुरा रिफाइनरीलाई ब्यालिस्टिक मिसाइलबाट निशाना बनाइएको हो ।

तर, साउदी अधिकारीहरूले रियादतर्फ प्रहार गरिएका दुईवटा मिसाइललाई आकाशमै रोक्दै नष्ट गरिएको बताएका छन् । राजधानीमा विस्फोटका आवाज सुनिएको र सर्वसाधारणलाई सुरक्षित स्थानमा जान मोबाइलमार्फत सतर्कता सूचना जारी गरिएको विवरण सार्वजनिक भएपछि सुरक्षा चिन्ता बढेको छ । यसैबीच, रास तनुरा क्षेत्रमा आगलागी भएको खबर पनि आएको छ ।

हुथी विद्रोहीको आक्रमणसम्बन्धी दाबी र साउदी अधिकारीको भनाइबीच भिन्नता रहेकाले मिसाइलले कुन-कुन संरचनामा क्षति पुर्‍यायो भन्ने विषय स्वतन्त्र रूपमा पुष्टि हुन सकेको छैन ।

रियादमा विस्फोटका आवाज, सर्वसाधारणलाई सतर्क रहन आग्रह

समाचार संस्था एएफपीका अनुसार मंगलबार रियादमा विस्फोटका आवाज सुनिएका थिए । स्थानीय बासिन्दाका मोबाइल फोनमा सुरक्षित स्थानमा जान आग्रह गर्दै सतर्कता सूचना पनि पठाइएको थियो । विस्फोटको आवाजले सहरको मध्य भागमा रहेका कार्यालयका झ्यालसमेत हल्लिएको विवरण सार्वजनिक भएको छ ।

तर, हुथी विद्रोहीले दाबी गरेअनुसार रक्षा मन्त्रालयमै मिसाइल प्रहार भएको हो वा होइन भन्नेबारे स्वतन्त्र पुष्टि भएको छैन । दुवै पक्षका भनाइ फरक रहेकाले आक्रमणको वास्तविक प्रभाव र क्षतिको विवरण अझै स्पष्ट हुन सकेको छैन ।

प्रमुख तेल रिफाइनरीलाई पनि निशाना बनाएको दाबी

हुथी विद्रोहीले साउदी अरबको पूर्वी प्रान्तमा फारसको खाडीको तटमा रहेको रास तनुरा तेल रिफाइनरीलाई पनि निशाना बनाएको दाबी गरेका छन् । हुथी सैन्य प्रवक्ता याह्या सरीका अनुसार रिफाइनरीमा ब्यालिस्टिक मिसाइल प्रहार गरिएको थियो, जसका कारण ठूलो आगलागी भएको हो ।

यसअघि साउदी नेतृत्वको सैन्य गठबन्धनले पूर्वी प्रान्ततर्फ प्रहार गरिएका तीनवटा मिसाइल खसालिएको जनाएको थियो ।

रास तनुराको दक्षिणमा पर्ने अल खोबरका एक स्थानीय बासिन्दाले एएफपीलाई बताएअनुसार बिहान मोबाइलमा सतर्कता सूचना प्राप्त भएपछि ठूलो विस्फोटको आवाज सुनिएको थियो ।

समुद्री सुरक्षा निकाय भ्यानगार्डले पनि मंगलबार बिहानै रास तनुरा क्षेत्रमा आक्रमणपछि आगलागी भएको सूचना दिएको थियो ।

दैनिक ५ लाख ५० हजार ब्यारेल प्रशोधन क्षमता

रास तनुरा साउदी अरबको ऊर्जा क्षेत्रका महत्त्वपूर्ण केन्द्रमध्ये एक हो । उक्त परिसरमा रहेको तेल रिफाइनरीको दैनिक प्रशोधन क्षमता करिब ५ लाख ५० हजार ब्यारेल रहेको विवरणमा उल्लेख छ ।

त्यसैले यहाँको उत्पादन वा तेल ढुवानी प्रक्रियामा अवरोध आएमा साउदी अरबको ऊर्जा क्षेत्रसँगै अन्तर्राष्ट्रिय तेल बजारमा समेत प्रभाव पर्न सक्नेछ । यद्यपि, पछिल्लो घटनाले तेल उत्पादन वा ढुवानीमा कस्तो असर पारेको छ भन्नेबारे तत्काल स्पष्ट विवरण उपलब्ध छैन ।

यसअघि मार्चको सुरुवातमा ड्रोन आक्रमणपछि रास तनुरा रिफाइनरीको केही भाग अस्थायी रूपमा बन्द गर्नुपरेको थियो । उक्त आक्रमणका लागि इरानलाई जिम्मेवार ठहराइएको थियो ।

पश्चिम एसियामा बढ्दो सैन्य तनावका बीच साउदी अरबका सुरक्षा तथा ऊर्जा संरचनालाई लक्षित गरिएको पछिल्लो घटनाले क्षेत्रीय सुरक्षाबारे थप चिन्ता बढाएको छ ।एजेन्सीबाट

प्रतिक्रिया दिनुहोस्