सुधन गुरुङको कमब्याक ! फेरि गृहमन्त्री बन्दै

नेपालको राजनीतिमा फेरि एकपटक ठूलो तरंग पैदा भएको छ। विवादका कारण गृहमन्त्री पदबाट गत बैशाख ९ गते बाहिरिएका पूर्वगृहमन्त्री सुधन गुरुङ अब पुनः त्यही मन्त्रालयको नेतृत्व गर्न फर्किने भएका छन्। आज दिउँसो ३ बजे उनको सपथग्रहण कार्यक्रम तय भएसँगै करिब डेढ महिनादेखि जारी राजनीतिक बहसको एउटा अध्याय टुंगिएको छ। तर, अर्को बहस भने यतिबेला सुरु भएको छ—के यो केवल एक मन्त्रीको पुनरागमन हो, कि सरकारको राजनीतिक सन्देश पनि ?

सुधन गुरुङले गत वैशाखमा आफ्ना सम्पत्ति, शेयर लगानी तथा केही व्यावसायिक सम्बन्धलाई लिएर सार्वजनिक रूपमा प्रश्न उठेपछि गृहमन्त्री पदबाट राजीनामा दिएका थिए। त्यसपछि सरकारले उच्च अदालतका पूर्वन्यायाधीश अच्युतप्रसाद भण्डारीको नेतृत्वमा छानबिन समिति गठन गरेको थियो। समितिले गुरुङको सम्पत्ति, आम्दानीको स्रोत, ऋण तथा लगानीका विभिन्न पक्षको अध्ययन गरेर ४५ पृष्ठको प्रतिवेदन सरकारलाई बुझाएको थियो।

छानबिन समितिको निष्कर्ष अनुसार गुरुङको सम्पत्तिको स्रोत अस्वाभाविक वा अवैध देखिने कुनै ठोस आधार फेला परेन। समितिले अधिकांश सम्पत्ति वैध स्रोतबाट आएको देखिएको उल्लेख गरेको छ। केही प्रशासनिक र प्रणालीगत कमजोरी देखिए पनि व्यक्तिगत रूपमा गुरुङ दोषी देखिने प्रमाण नभेटिएको प्रतिवेदनमा उल्लेख गरिएको छ।

यही प्रतिवेदन सरकारलाई बुझाएको दुई दिनपछि नै गुरुङ पुनः गृहमन्त्री बन्न लागेका हुन्। राजनीतिक रूपमा यो घटनालाई धेरैले महत्त्वपूर्ण संकेतका रूपमा हेरेका छन्। किनभने गुरुङले राजीनामा दिएपछि गृहमन्त्रालय प्रधानमन्त्री बालेन शाह आफैंले सम्हाल्दै आएका थिए। त्यतिबेला नै धेरै विश्लेषकले छानबिन सकिएपछि गुरुङलाई पुनः फर्काउने तयारी भइरहेको अनुमान गरेका थिए।

गुरुङ स्वयंले पनि केही दिनअघि सार्वजनिक कार्यक्रममा आफूले छानबिनलाई सहज बनाउन पद छाडेको र सत्य बाहिर आउनेमा विश्वास रहेको बताएका थिए। छानबिनबाट सफाइ पाएपछि अब उनी अझ बलियो रूपमा फर्किने राजनीतिक सन्देश दिन खोजिएको टिप्पणी भइरहेको छ।

तर प्रश्नहरू अझै बाँकी छन्। छानबिन समितिले सम्पत्तिको विषयमा सफाइ दिए पनि विपक्षीहरूले समितिको निष्पक्षतामाथि प्रश्न उठाउन सक्ने सम्भावना छ। अर्कोतर्फ, समर्थकहरू भने यसलाई तथ्य र प्रमाणका आधारमा भएको न्यायपूर्ण निष्कर्षका रूपमा व्याख्या गरिरहेका छन्।

अब सबैको नजर फेरि गृहमन्त्रालयतर्फ मोडिएको छ। पुनः जिम्मेवारी सम्हाल्न लागेका सुधन गुरुङले आफ्नो दोस्रो इनिङ्समा सुरक्षा, सुशासन र विवादित मुद्दाहरूलाई कसरी अगाडि बढाउँछन् भन्ने विषयले आगामी राजनीतिक दिशालाई समेत प्रभावित पार्न सक्छ।

आज दिउँसो ३ बजे हुने सपथसँगै सुधन गुरुङको गृहमन्त्रालयमा पुनरागमन औपचारिक रूपमा सुरु हुनेछ। तर उनको वास्तविक परीक्षा भने अब सुरु हुँदैछ।

प्रतिक्रिया दिनुहोस्