फिलिपिन्स भूकम्प अपडेट : १५ को मृत्यु, १२९ घाइते

दक्षिणी फिलिपिन्समा गएको ७.८ म्याग्निच्युडको शक्तिशाली भूकम्पमा परी कम्तीमा १५ जनाको मृत्यु भएको छ भने १२९ जना घाइते भएका छन् ।

फिलिपिन्सको नागरिक रक्षा कार्यालयका अनुसार, मृतक मध्ये १२ जना सोक्सार्जेन क्षेत्रका बासिन्दा हुन्। भूकम्पका कारण दुई दर्जनभन्दा बढी व्यावसायिक भवन तथा प्रतिष्ठानहरूमा क्षति पुगेको छ ।

भूकम्पले जनजीवन अस्तव्यस्त पारेको छ, विशेष गरी नयाँ शैक्षिक सत्र सुरु भएको पहिलो दिन नै विद्यालयहरूमा ठूलो त्रास फैलिएको छ। सामाजिक सञ्जालमा सार्वजनिक भिडियोहरूमा जमिन तीव्र रूपमा हल्लिँदा विद्यार्थीहरू डरले चिच्याइरहेको दृश्य देखिएको छ ।

साथै, मुख्य भूकम्पपछि हालसम्म १३८ वटा परकम्पहरू मापन गरिएको छ, जसको तीव्रता १.३ देखि ६.७ म्याग्निच्युडसम्म रहेको छ। हाल प्रभावित क्षेत्रमा उद्धार, राहत तथा क्षतिको विस्तृत मूल्यांकन कार्य तीव्र रूपमा भइरहेको अधिकारीहरूले जनाएका छन् ।

भूकम्पपछि फिलिपिन्सको सामाजिक कल्याण तथा विकास विभागले प्रभावित क्षेत्रमा तत्काल राहत तथा उद्धार कार्य तीव्र पार्न स्थानीय तहहरूसँग समन्वय गर्न निर्देशन दिएको छ । विभागका अनुसार मिन्दानाओ क्षेत्रमा प्रभावित परिवारका लागि १० लाखभन्दा बढी खाद्य सहायता प्याकेट तयारी अवस्थामा राखिएको छ ।

विभागले देशभर करिब ४.७ मिलियन खाद्य सहायता प्याकेट पूर्वतयारी अवस्थामा रहेको र आवश्यक परे तत्काल वितरण गर्न सकिने जनाएको छ । द्रुत प्रतिक्रिया टोलीहरू समेत उच्च सतर्कतामा राखिएको छ ।

फिलिपिन्सका राष्ट्रपति फेरडिनान्ड मार्कोसले भूकम्पलगत्तै आपत्कालीन निकायहरू परिचालन गरिएको जानकारी दिएका छन् । नागरिक सुरक्षा कार्यालय तथा राष्ट्रिय विपद् जोखिम न्यूनीकरण तथा व्यवस्थापन परिषद्लाई सक्रिय बनाइएको उनले बताएका छन् ।

यसैबीच, सुनामीको जोखिमलाई ध्यानमा राख्दै सराङ्गानी, दाभाओ ओक्सिडेन्टल, तावी–तावी र सुलु लगायत नौ प्रान्तका तटीय क्षेत्रका बासिन्दालाई सुरक्षित स्थानतर्फ जान आग्रह गरिएको छ ।

इन्डोनेसियाका केही उत्तरी क्षेत्रहरूमा समेत उच्च स्थानमा सर्न निर्देशन दिइएको छ । जापान, फिलिपिन्स र इन्डोनेसियाले समुद्री छालाको जोखिमबारे चेतावनी जारी गर्दै तटीय क्षेत्रका नागरिकलाई सतर्क रहन आग्रह गरेका छन् ।

अमेरिकी प्रशान्त सुनामी चेतावनी केन्द्रले फिलिपिन्सका केही तटीय क्षेत्रमा चार मिटरसम्म अग्ला छालाहरू आउन सक्ने जनाएको छ भने इन्डोनेसिया र मलेसियाका केही भागमा एक मिटरसम्मका छालाहरू सम्भावित रहेको बताएको छ । अधिकारीहरूले प्रभावित क्षेत्रमा उद्धार, राहत तथा क्षतिको मूल्याङ्कन कार्य जारी रहेको बताएका छन् ।

प्रतिक्रिया दिनुहोस्