संसारको जुनसुकै कुनामा हमला गर्न सक्ने घातक हतियार बनाउँदै ट्रम्प

अमेरिकी राष्ट्रपति डोनाल्ड ट्रम्प आफ्नो नाम इतिहासमा लेखाउन चाहन्छन् भन्ने कुरा कसैबाट लुकेको छैन, चाहे त्यो जसरी नै किन होस्।

कैयौँ पटक ट्रम्प यस प्रयासमा आत्ममुग्धताको चरम सीमामा पुग्ने गर्छन्। यसको अर्को उदाहरण बाहिर आएको छ- अमेरिकाले आफ्नो इतिहासकै सबैभन्दा ठूलो जंगी जहाज (युद्धपोत) बनाउन लागेको छ र ट्रम्पले त्यसको नाम आफ्नै नाममा राखिने बताएका छन्।

अमेरिकी राष्ट्रपति डोनाल्ड ट्रम्पले सोमबार अमेरिकाका लागि भारी हतियारले सुसज्जित युद्धपोतहरूको एउटा नयाँ तह निर्माण गर्ने घोषणा गरे, जसको नाम उनकै नाममा राखिनेछ।

यस विषयमा प्रश्नहरू उठिरहेका छन् किनभने जंगी जहाजहरूको नाम सामान्यतया पद छोडिसकेका अमेरिकी राष्ट्रपति वा नेताहरूको नाममा राख्ने चलन छ।

सुरुवातमा ‘ट्रम्प श्रेणी’ का दुईवटा युद्धपोत निर्माण गरिनेछ, तर राष्ट्रपतिका अनुसार यो संख्या उल्लेख्य रूपमा बढ्न सक्छ। उनले यी जहाजहरू ‘सतहमा लड्ने सबैभन्दा घातक युद्धपोतमध्ये एक’ र ‘हाम्रो देश (अमेरिका) को इतिहासकै सबैभन्दा ठूला युद्धपोत’ हुने बताएका छन्।

ट्रम्प क्लासका युद्धपोतका विशेषताहरू के हुनेछन्?

• ट्रम्पले यी युद्धपोतहरूको तौल ३०,००० देखि ४०,००० टनसम्म हुने बताएका छन्।

• यी जहाजहरू मिसाइल र बन्दुकका साथै लेजर र हाइपरसोनिक मिसाइल जस्ता तमाम अत्याधुनिक हतियारहरूले सुसज्जित हुनेछन्।

• यी जहाजहरू समुद्रबाट प्रहार गर्न मिल्ने क्रुज मिसाइलमार्फत परमाणु हतियार बोक्न पनि सक्षम हुनेछन्।

• ट्रम्प क्लासका जहाजहरू हालका अमेरिकी ‘डिस्ट्रोयर’ र ‘क्रुजर’ को तुलनामा निकै ठूला हुनेछन्। यद्यपि, ट्रम्पले गरेका खुलासाका आधारमा यी जहाजहरू सन् १९९० को दशकमा रिटायर भएका अमेरिकाका पुराना ‘आयोवा क्लास’ का जहाजभन्दा केही हदसम्म साना नै हुने अनुमान गरिएको छ ।

के यो चीनसँगको प्रतिस्पर्धाको तयारी हो?

यो नयाँ युद्धपोत अमेरिकाको प्रतिद्वन्द्वी चीनका लागि जवाफ हो कि भनेर सोधिएको प्रश्नमा ट्रम्पले सिधा जवाफ दिन अस्वीकार गरे। बरु उनले भने, ‘यो सबैका लागि एउटा जवाफ हो, यो चीन मात्र होइन। चीनसँग हाम्रो सम्बन्ध राम्रो छ।’

उल्लेखनीय कुरा, आफ्नो नौसेनामा जहाजहरूको संख्याको कुरा गर्दा अमेरिका चीनभन्दा निकै पछाडि परेको छ। यसै वर्षको सुरुमा अमेरिकी कंग्रेस (संसद) लाई दिइएको एक रिपोर्टमा अमेरिकी सैन्य अधिकारी र अन्य पर्यवेक्षकहरूले चीनले जुन गतिमा जहाज निर्माण गरिरहेको छ, त्यसप्रति चिन्ता व्यक्त गरेका थिए।

एजेन्सीहरूको सहयोगमा

प्रतिक्रिया दिनुहोस्