Salina Magar 
काठमाडौं । राष्ट्रिय स्वतन्त्र पार्टी (रास्वपा) ले सर्वदलीय बैठकबाट आव्हान गरेको छ । बैठक दिउँसो २ बजे रास्वपाको संसदीय दलको कार्यालय, सिंहदरबारमा बस्ने भएको हो ।
रास्वपाले विपद् व्यवस्थापन, पुनर्निर्माण तथा जोखिम न्यूनीकरणका लागि उच्चस्तरीय सर्वदलीय संयन्त्र गठन गर्ने प्रक्रिया अघि बढाउन छलफल आयोजना गरेको हो ।
भोटेकोशीमा आएको अप्रत्याशित तथा विनाशकारी बाढी–पहिरोलगत्तै बसेको सर्वदलीय बैठकबाट नेपालमा विपद्को दिगो समाधान र पूर्वतयारीका विषयमा १० बुँदे साझा सङ्कल्प पारित गरिएको थियो ।
सोही संकल्पको बुँदा नम्बर १० अनुसार विपद् व्यवस्थापनलाई तत्कालीन राहत र प्रतिक्रियामा मात्र सीमित नराखी दीर्घकालीन समाधान खोज्नुपर्नेमा जोड दिइएको रास्वपाले जनाएको छ ।
रास्वपाका अनुसार विपद्पछिको पुनर्निर्माण, जलवायु अनुकूलन, राष्ट्रिय विपद् नीतिमा समयानुकूल सुधार तथा सरकारका कामकारबाहीमा निरन्तर सल्लाह, सहयोग र अनुगमन गर्न ‘संसदीय समिति’ अर्थात् उच्चस्तरीय सर्वदलीय संयन्त्र गठन गर्ने सहमति भएको थियो ।
सोही सहमतिलाई कार्यान्वयन गर्दै संयन्त्र गठनको प्रक्रिया अविलम्ब अघि बढाउने विषयमा छलफल गर्न रास्वपाले सर्वदलीय बैठक बोलाएको हो ।
रास्वपाले सम्बन्धित दल तथा प्रतिनिधिहरूलाई बैठकमा उपस्थित हुन आग्रह गरेको छ ।
प्रतिक्रिया दिनुहोस्