सरकारलाई कार्यशैली बदल्न सांसद शाहीको चेतावनी,

नेपाली कम्युनिस्ट पार्टीका सांसद महेन्द्रबहादुर शाहीले सरकारले आफ्नो कार्यशैली बदल्नुपर्ने भन्दै आलोचना गरेका छन्।

प्रतिनिधि सभाको बुधवार बसेको बैठकमा बोल्दै सांसद शाहीले सरकारले ट्रयाक छोडेर हिँड्दा गम्भीर दुर्घटना निम्तिने चेतावनी दिएका हुन्।

वर्तमान सरकारको कार्यसम्पादनप्रति असन्तुष्टि जनाउँदै उनले सही मार्गमा फर्किन र आफ्नो परिपक्वता प्रदर्शन गर्न सरकारलाई आग्रह गरे। सरकारले आफ्नो कार्यशैली नसच्याए भोलिका दिनमा नराम्रो परिणाम भोग्नुपर्ने अवस्था आउन सक्ने उनको भनाइ छ।

राजधानी काठमाडौँबाट कर्णाली जोड्ने मुख्य राजमार्ग र करिडोरहरूमा भइरहेको अवरोधप्रति उनले विशेष चिन्ता व्यक्त गरेका छन्। कर्णालीका नागरिक पटक-पटक बाढी र पहिरोको चपेटामा परे पनि राज्यले यसलाई गम्भीरताका साथ नलिएको उनले बताए। कालिकोटका गगने खोला, एस मोड, खल्लागाड र राजुली क्षेत्रमा निरन्तर खस्ने पहिरोले जनजीवन कष्टकर बनाएको उनले उल्लेख गरे।

संसद्मा बोल्दै सांसद शाहीले भने, ‘चाडपर्वको मुखमा नागरिकहरूलाई घर जानसमेत सास्ती भइरहेको छ। सरकारले तत्कालै मेसिन र प्राविधिक जनशक्ति परिचालन गरी सडक सुचारु गर्नुपर्छ। केवल पहिरो पन्छाउने कार्यले मात्रै दीर्घकालीन समस्या समाधान हुँदैन, कर्णाली राजमार्गका जीर्ण सेफ्टी बारहरू फेर्न र जोखिमयुक्त स्थानमा आधुनिक सुरक्षा संरचना निर्माण गर्न सरकारको ध्यान जाओस्।’

प्रतिक्रिया दिनुहोस्