कांग्रेस १५औँ महाधिवेशन : अन्तिम मतदाता नामावली सार्वजनिक

नेपाली कांग्रेसको १५औँ महाधिवेशनअन्तर्गत केन्द्रीय कार्यसमिति निर्वाचन प्रयोजनका लागि केन्द्रीय निर्वाचन समितिले केन्द्रीय महाधिवेशन प्रतिनिधि एवं मतदाताहरूको अन्तिम नामावली औपचारिक रूपमा सार्वजनिक गरेको छ ।

कांग्रेसको १५औँ महाधिवेशनका लागि ७ हजार २ सय ५५ जना अन्तिम मतदाता कायम भएका छन् ।

कांग्रेसको विधान २०१७ (एघारौँ संशोधन सहित) तथा निर्वाचन निर्देशिका, २०८३ बमोजिम काठमाडौंमा सञ्चालन भइरहेको महाधिवेशनका लागि प्रारम्भिक मतदाता नामावली उपर परेका दाबी–विरोध तथा उजुरीहरूमाथि आवश्यक छानबिन गरी अन्तिम नामावली टुङ्गो लगाइएको निर्वाचन समितिले जनाएको छ ।

समिति सदस्य–सचिव राजु कटुवालद्वारा जारी सूचना अनुसार उक्त नामावली पार्टीको आधिकारिक वेबसाइट तथा फेसबुक पेजमार्फत समेत सार्वजनिक गरिएको छ ।

यसैगरी सभापतिमा गगनकुमार थापा, श्यामकृष्ण खड्की र किशोरसिंह राठौरले उम्मेदवारी दिएका छन् । वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसालको उम्मेदवारी परेको छ ।

खुला उपसभापतिमा डा. चन्द्र भण्डारी, देवराज चालिसे, सुरेन्द्रराज पाण्डे, मधु आचार्य, डा. मिनेन्द्र रिजाल, दीपक गिरी, धनराज गुरुङ, गोविन्द भट्टराई र डा. चन्द्रमोहन यादव गरी नौ जनाले उम्मेदवारी दिएका छन् ।

समावेशी उपसभापतिमा जीवन परियार, विनोद चौधरी, फर्मुल्लाह मनसुर, सीता गुरुङ र रञ्जित कर्ण गरी पाँच जनाको उम्मेदवारी परेको छ ।

खुला महामन्त्रीमा प्रदीप पौडेल, गुरुराज घिमिरे, उदयशमशेर राणा, अमरसिंह पुन, नैनसिंह महर, शंकर तिवारी, डा. सुनील शर्मा र डा. सन्तोष उपाध्याय गरी आठ जनाले उम्मेदवारी दिएका छन् । महिला महामन्त्रीमा डा. डिला संग्रौला, डिना उपाध्याय र रीता खनाल गरी तीन जनाको उम्मेदवारी परेको छ ।

यो समाचार तयार पार्दासम्म सभापतिमा तीन, वरिष्ठ उपसभापतिमा एक, महिला उपसभापतिमा एक, खुला उपसभापतिमा नौ, समावेशी उपसभापतिमा पाँच, खुला महामन्त्रीमा आठ र महिला महामन्त्रीमा तीन गरी कुल ३० जनाको उम्मेदवारी परेको छ ।

प्रतिक्रिया दिनुहोस्