हिमलुङमा बेपत्ताको खोजी र पोल्यान्डका नेपाली श्रमिकको समस्या समाधान गर्न सरकारको ध्यानाकर्षण

 

काठमाडौं । श्रम संस्कृति पार्टीका सांसद आर्यन राईले मनाङको हिमलुङ हिमालमा हिमपहिरोमा परी बेपत्ता भएका नेपालीको खोजी गर्न सरकारको ध्यानाकर्षण गराएका छन्।

बुधबार प्रतिनिधिसभा बैठकमा बोल्दै उनले असोज ११ गते गएको हिमपहिरोमा खोटाङ ऐसेलुखर्कका तीन जना कुक बेपत्ता भएको बताए। तीमध्ये घनश्याम राईको शव भेटिए पनि लखकुमार गुरुङ र सुरज राई अझै बेपत्ता रहेको उनले जानकारी दिए।

‘सरकारले खोजी कार्यमा चाहिँ त्यहाँ कुनै पनि खोजी कार्य भएको छैन भन्ने उहाँहरूको आफन्तबाट गुनासो छ। त्यसमा चाहिँ के गर्न सकिन्छ, सम्बन्धित मन्त्रालयको म ध्यानाकर्षण गराउन चाहन्छु,’ उनले भने।

त्यस्तै, त्रिपुरेश्वरमा बसमा आगो लगाएर आत्मदाह गरेका अर्जुन दोङ तामाङको परिवारसँग सरकारले संवाद नगरेको भन्दै उनले गृहमन्त्रीको ध्यानाकर्षण गराए।

उनले भने, ‘अर्जुन दोङ तामाङको परिवारसँग सरकारले कुनै पनि संवाद, वार्ता केही पनि नगरेको भन्ने छ गुनासो। अहिले भर्खरै बाहिर आएर उहाँहरू गृहमन्त्रीज्यूसँग बस्नलाई कुरिराख्नुभएको छ, भित्र छिर्न पाउनुभएको छैन। यो के भएको हो ?’

सांसद राईले पोल्यान्डमा नेपाली श्रमिकले बैंक खाता खोल्न नपाउँदा समस्या भोगिरहेको विषय पनि उठाए। नेपाल ‘ग्रे लिस्ट’मा रहेको भन्दै बैंकले खाता खोल्न नमानेको नेपाली श्रमिकको गुनासो रहेको उनले बताए।

प्रतिक्रिया दिनुहोस्