ओम डिसी 
लमजुङको राईनास नगरपालिका-६ मा गाँजा खरिदबिक्रीको विषयलाई लिएर भएको सामान्य विवादले एउटा अकल्पनीय र विभत्स रूप लिएको छ। साउन २३ गते राति करिब नौ बजे, घरमा एक्लै रहेकी ७५ वर्षीया काली सार्कीको उनकै छिमेकी ४८ वर्षीय प्रेम अछामीले हँसिया प्रहार गरी नृशंस हत्या गरेका छन्।
प्रहरीको प्रारम्भिक अनुसन्धान अनुसार अछामी गाँजा किन्न सार्कीको घरमा पुगेका थिए। त्यसक्रममा दुवैबीच गाँजाको मूल्य र पैसाको विषयलाई लिएर भनाभन सुरु भयो। विवाद चर्कँदै जाँदा आक्रोशित बनेका अछामीले नजिकै रहेको हँसियाले ती वृद्ध आमामाथि अन्धधुन्ध प्रहार गरे। हँसियाको गम्भीर चोटका कारण सार्कीको घट्नास्थलमै दर्दनाक मृत्यु भयो।
हत्यापछि पनि अछामीको क्रूरता रोकिएन। उनले मृतकाको शरीरमा रहेका बहुमूल्य गरगहनासमेत लुटे। अपराध लुकाउने कुत्सित मनसायले उनले वृद्धाको रगतले लत्पतिएको शवलाई घरकै खाटमुनि थिचेर फालेका थिए। साउन २५ गते प्रहरीले अछामीलाई नियन्त्रणमा लिएपछि यो बीभत्स घटनाको रहस्य खुलेको हो। जीवनको उत्तरार्धमा आफ्नै घरभित्र यसरी अमानवीय ढंगले वृद्धाको हत्या भएपछि अहिले सिङ्गो राईनास गाउँ शोक र स्तब्धतामा डुबेको छ। प्रहरीले पक्राउ परेका अछामीमाथि थप गहन अनुसन्धान भइरहेको जनाएको छ।
प्रतिक्रिया दिनुहोस्