सुर्खेतकी इनिशा विक मृत्यु प्रकरणको निष्पक्ष छानबिनको माग गर्दै काठमाडौंमा प्रदर्शन

सुर्खेतको वीरेन्द्रनगरस्थित जनजागरण सामुदायिक वनमा १६ वर्षीया इनिशा विक मृत फेला परेको घटनाको निष्पक्ष छानबिनको माग गर्दै पीडित परिवारले प्रदर्शन गरेका छन् ।

बुधबार पीडित परिवार, आफन्त र स्थानीयले खबरदारी र्‍याली निकाल्दै घटनाको सत्यतथ्य सार्वजनिक गर्न तथा दोषीमाथि कारबाही गर्न माग गरेका हुन्।
र्‍यालीमा सहभागीहरूले ‘बालिकामाथि हुने बलात्कार, हत्या र हिंसा बन्द गर’, ‘इनिशालाई न्याय देऊ’, ‘हत्यारालाई कडा कारबाही गर’ जस्ता नारासहित प्रदर्शन गरेका छन्। प्रदर्शनकारीहरूले घटनालाई गम्भीरतापूर्वक अनुसन्धान गरी वास्तविक दोषी पहिचान गर्नुपर्ने र पीडित परिवारलाई न्याय दिलाउन राज्यले प्रभावकारी कदम चाल्नुपर्ने माग राखेका छन् । उनीहरूले छानबिन प्रक्रिया निष्पक्ष, पारदर्शी र द्रुतगतिमा अघि बढाउन माग गरेका छन्।

पीडित परिवारले घटनाबारे सत्यतथ्य सार्वजनिक नभएसम्म आन्दोलन जारी राख्ने चेतावनी दिएका छन् । उनीहरूले बालिका तथा महिलामाथि हुने हिंसा र हत्या जस्ता घटनामा राज्य गम्भीर बन्नुपर्ने भन्दै दोषीलाई कानुनअनुसार कडा सजाय दिनुपर्ने बताएका छन् ।१६ वर्षीया इनिशा विक ट्युसन पढ्न घरबाट निस्केकी थिइन् । तर केही समयपछि उनी वीरेन्द्रनगरस्थित जनजागरण सामुदायिक वन क्षेत्रमा मृत अवस्थामा फेला परेकी थिइन् ।
घटनाको अनुसन्धानका लागि प्रहरीले केही व्यक्तिलाई नियन्त्रणमा लिएर सोधपुछ गरिरहेको जनाएको छ ।

प्रतिक्रिया दिनुहोस्